ਲਫ਼ਜ਼ਾਂ ਦੀ ਦੁਨੀਆ ਸਾਹਿਤ ਸਭਾ, ਨਕੋਦਰ ਨੇ ਇੱਕ ਸਾਲ ਵਿੱਚ ਇਕ ਸੌ ਤੇਰਾਂ ਉਸਾਰੂ ਪ੍ਰੋਗਰਾਮ ਕਰਵਾਏ।
'ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਨੂੰ ਸਮਰਪਿਤ ਹੋ ਕੇ ਕਾਰਜ ਕਰਦੀ ਹੈ ਸਾਡੀ ਸਭਾ' - ਪ੍ਰੋ. ਜਸਵੀਰ ਸਿੰਘ (ਪ੍ਰਧਾਨ)
ਲਫ਼ਜ਼ਾਂ ਦੀ ਦੁਨੀਆ ਸਾਹਿਤ ਸਭਾ, ਨਕੋਦਰ ਨੇ ਆਪਣੀ ਹੋਂਦ ਦੇ ਪਹਿਲੇ ਸਾਲ ਨੂੰ ਪੂਰਾ ਕਰਦਿਆਂ 02 ਅਪ੍ਰੈਲ, 2021 ਤੋਂ 27 ਮਾਰਚ, 2022 ਦੌਰਾਨ 113 ਸਾਹਿਤਕ, ਸਮਾਜਿਕ, ਰਾਜਨੀਤਕ ਅਤੇ ਧਾਰਮਿਕ ਚੇਤਨਤਾ ਦਿੰਦੇ ਸਮਾਗਮ ਕਰਵਾਏ। ਜਿਨ੍ਹਾਂ ਵਿੱਚ ਵਿਚਾਰ ਚਰਚਾ, ਕੁਇਜ਼ ਮੁਕਾਬਲੇ, ਪ੍ਰਦਰਸ਼ਨੀਆਂ, ਕਵੀ ਦਰਬਾਰ, ਕਹਾਣੀ ਦਰਬਾਰ, ਗੋਸ਼ਟੀਆਂ, ਕਿਤਾਬਾਂ ਲੋਕ ਅਰਪਣ, ਇਤਿਹਾਸਕ ਖੋਜ ਕਾਰਜ, ਕਰੀਅਰ ਅਗਵਾਈ, ਪਾਠਕ ਦਰਬਾਰ ਅਤੇ ਸਾਹਿਤਕ ਖੋਜ ਕਾਰਜ ਆਦਿ ਨਾਲ ਸੰਬੰਧਿਤ ਲਗਾਤਾਰਤਾ ਨਾਲ਼ ਉਸਾਰੂ ਸਮਾਗਮ ਕਰਵਾ ਕੇ ਲਫ਼ਜ਼ਾਂ ਦੀ ਦੁਨੀਆਂ ਸਾਹਿਤ ਸਭਾ, ਨਕੋਦਰ ਦੁਨੀਆ ਦੀ ਪਹਿਲੀ ਅਜਿਹੀ ਸਾਹਿਤਕ ਸਭਾ ਬਣ ਗਈ ਹੈ ਜਿਸ ਨੇ ਆਪਣੇ ਪਹਿਲੇ ਸਾਲ ਵਿੱਚ ਸਭ ਤੋਂ ਵੱਧ ਸਮਾਗਮ ਕਰਵਾਏ ਹਨ।
ਲਫ਼ਜ਼ਾਂ ਦੀ ਦੁਨੀਆ ਸਾਹਿਤ ਸਭਾ, ਨਕੋਦਰ ਦੇ ਬਾਨੀ ਅਤੇ ਪ੍ਰਧਾਨ ਪ੍ਰੋ. ਜਸਵੀਰ ਸਿੰਘ ਸ਼ਾਇਰ ਨੇ ਦੱਸਿਆ ਕਿ ਅਸੀਂ ਹਰ ਨੁਕਤੇ ਨੁਹਾਰ ਤੋਂ ਪਿੰਡ ਤੋਂ ਕੌਮਾਂਤਰੀ ਪੱਧਰ ਤੱਕ ਦੇ ਪ੍ਰੋਗਰਾਮਾਂ ਨੂੰ ਤਰਤੀਬ ਵਿੱਚ ਕਰਵਾਉਣ ਲਈ ਯਤਨਸ਼ੀਲ ਰਹੇ ਹਾਂ। ਅਨੇਕਾਂ ਨਵੇਂ ਲੇਖਕਾਂ ਲਈ ਮੰਚ ਪ੍ਰਦਾਨ ਕੀਤਾ ਅਤੇ ਪ੍ਰੋੜ੍ਹ ਸਾਹਿਤਕਾਰਾਂ ਲਈ ਢੋਈ ਬਣੇ ਹਾਂ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਸਭਾ ਦੇ ਪ੍ਰੋਗਰਾਮਾਂ ਵਿੱਚ ਹਰ ਵੱਡੇ ਤੋਂ ਵੱਡਾ ਵਿਦਵਾਨ, ਗਾਇਕ, ਕਮੇਡੀਅਨ ਅਤੇ ਸਾਹਿਤਕਾਰ ਸ਼ਾਮਲ ਹੋਇਆ ਹੈ ਇਸੇ ਤਰ੍ਹਾਂ ਨਵੇਂ ਤੋਂ ਨਵਾਂ ਲੇਖਕ ਤੇ ਪਾਠਕ ਵੀ ਜੁੜਿਆ ਹੈ ਜੋਕਿ ਸਾਹਿਤਕ ਖੇਤਰ ਲਈ ਸ਼ੁੱਭ ਸ਼ਗਨ ਵਾਂਗ ਹੈ।
ਲਫ਼ਜ਼ਾਂ ਦੀ ਦੁਨੀਆ ਸਾਹਿਤ ਸਭਾ, ਨਕੋਦਰ ਦੇ ਪ੍ਰਧਾਨ ਪ੍ਰੋ. ਸ਼ਾਇਰ ਨੇ ਸਭਾ ਦੇ ਮੈਂਬਰਾਂ ਬਾਰੇ ਦੱਸਿਆ ਕਿ ਪ੍ਰੀਤ ਲੱਧੜ, ਲੇਖਕ ਕਲਮ ਨਾਦ ਉੱਪ ਪ੍ਰਧਾਨ, ਪ੍ਰੋਗਰਾਮਰ ਬਲਰਾਜ ਸਭਾ ਦਾ ਸਕੱਤਰ ਵਜੋਂ ਕਾਰਜ ਕਰ ਰਹੇ ਹਨ। ਉਨ੍ਹਾਂ ਨੇ ਪੱਤਰਕਾਰ ਵੀਰਾਂ ਹਰਦੀਪ ਸਿੰਘ ਸ਼ਾਹਕੋਟ, ਰਾਜਿੰਦਰ ਸਿੰਘ ਸੋਨੂੰ, ਪ੍ਰੀਤਮ ਲੁਧਿਆਣਵੀ, ਪੰਜਾਬੀ ਵਿਰਾਸਤ ਟੀ.ਵੀ. ਤੋਂ ਸੰਦੀਪ ਡਰੋਲੀ ਆਦਿ ਦਾ ਪ੍ਰੋਗਰਾਮਾਂ ਦੀ ਸਵੱਲੀ ਕਵਰੇਜ਼ ਲਈ ਵਿਸ਼ੇਸ਼ ਧੰਨਵਾਦ ਕੀਤਾ। ਲਫ਼ਜ਼ਾਂ ਦੀ ਦੁਨੀਆ ਸਾਹਿਤ ਸਭਾ,ਨਕੋਦਰ ਦੇ ਸਾਰੇ ਪ੍ਰੋਗਰਾਮ ਐੱਲ.ਡੀ.ਡੀ. ਟੀ.ਵੀ. 'ਤੇ ਲਾਇਵ ਕੀਤੇ ਗਏ।
Comments
Post a Comment